मोक्ष LOVE
सौंदर्यतऱ्हा सादर होत आहेत
हाताने केसाचे अश्व उधळणे
ओठाचा चंबू करून बांबू लावणे
बोटांचे सर्प नाकासमोरून ओढणे
दोन बोटांनी डोळ्यातील पाण्यासमोर मासे बनवणे
जाणीवपूर्वक स्तनखळी उघडी टाकणे
पापण्या लवलवत विजांना धार काढणे
कारण नसताना स्तनांना फुटबॉल बनवणे
देहाच्या थेंबातून तयार होत जाणाऱ्या नद्या
डोळे ओले होत नाहीत वासना ओल्या होतात
शिट्या वाजवणाऱ्या मिठ्या
गरम होणारे हात
टेकाडापोटी काडकन मोडणारे पुरुष
शेकोट्या पेटवायला अग्नीची साधना
स्क्रीन नेमके किती स्कीन खातात
ऑफिसमध्येसुद्धा वेळ वाया घालवणारे लोक
डोळे भाजून घेऊन नेमके काय आत भाजतात
भास भासतात की पोळतात?
ब्युटी ही ड्रग बनत असेल
तर नेमका कोणता ट्रॅफिक
जाम होत असेल ?
की हे सर्व स्ट्रेस बस्टर आहे ?
मी विद्यार्थ्यांना आवरावे की सावरावे या विवंचनेत
हा डिजिटल मधून वाहणारा निसर्ग आहे की डिजीरोगाची साथ?
भासच स्टॅंडर्ड सेट करत चाललेले
आणि दिवसेंदिवस फिके पडत चाललेले वास्तव
मेकअपचा भडिमार अधिकाधिक स्वतःला आभासी बनवणारा
प्रथमच स्किन स्क्रीन फॉलो करतीये
आता मी हृदयाच्या जागी हार्ट इमोजी प्लेस कराव्यात का?
श्रीधर तिळवे नाईक
(मोक्ष सिरीज मधील मोक्ष साइड इफेक्ट या काव्यफायलीतून)
Comments
Post a Comment